Watanzania wahimizwa kumuombea Magufuli
MCHUNGAJI Kiongozi wa Kanisa la Nchi ya Ahadi lililopo Sinza Dar es Salaam, Harris Kapiga, amewaomba Watanzania kumuombea Rais John Magufuli ili Mungu amlinde kwa kazi anayoifanya ya kuiweka nchi katika mstari baada ya kuingia madarakani.
Pia amewataka watumishi wa Mungu, kuwafundisha watu haki yote ili taifa liweze kuinuliwa. Mchungaji Kapiga alisema hayo alipokuwa akizungumza na gazeti hili.
Aidha, kuhusu Rais Magufuli, Mchungaji huyo alimuomba akubali mwito wa viongozi wa dini wa kukutana naye kwa ajili ya kumpa ushauri.
Alisisitiza kuwa taifa likipata viongozi wenye hofu ya Mungu, litakuwa na sifa ndani na nje ya nchi.
Kwa upande wa dawa za kulevya, Mchungaji huyo alisema vijana ambayo ni nguvu kazi kubwa ya taifa, hivi sasa wengi wao wanakufa kutokana na matumizi ya dawa za kulevya.
Hivyo, aliwaomba viongozi wa dini kukemea matumizi ya dawa hizo.
“Vijana wengi wamekuwa wakijiingiza kwenye makundi mabaya kama ya dawa za kulevya, uzinzi na mengineyo. Ni maombi tu ndiyo yatamaliza mambo haya endapo viongozi wa dini watasimama imara,” alisema Kapiga.
Alisisitiza kuwa lazima watumishi wa Mungu, wakemee mambo yote ambayo yanaenda kinyume na mapenzi ya Mungu ili taifa liwe katika mstari unaotakiwa.
No comments:
Post a Comment